bikhre to phir baham mere ajza nahin hue

bikhre to phir baham mire ajzā nahīñ hue

sarzad agarche mo.ajize kyā kyā nahīñ hue

jo rāste meñ khet na sairāb kar sake

kyuuñ jazb dasht hī meñ vo dariyā nahīñ hue

insān hai to paañv meñ laġhzish zarūr hai

jurm-e-shikast-e-jām bhī bejā nahīñ hue

ham zindagī kī jang meñ haare zarūr haiñ

lekin kisī mahāz se paspā nahīñ hue

insāñ haiñ ab to muddatoñ ham devtā rahe

shakleñ nahīñ banīñ jo hayūlā nahīñ hue

Thahro abhī ye khel mukammal nahīñ huā

jī bhar ke ham tumhārā tamāshā nahīñ hue

har sar se āsmān kī chhat uTh nahīñ ga.ī

kab tajrbe meñ shahr ye sahrā nahīñ hue

'shaukat' dayār-e-shauq kī raunaq unhī se hai

jo apnī zaat meñ kabhī tanhā nahīñ hue

bikhre to phir baham mere ajza nahin hue

sarzad agarche moajize kya kya nahin hue

jo raste mein khet na sairab kar sake

kyun jazb dasht hi mein wo dariya nahin hue

insan hai to panw mein laghzish zarur hai

jurm-e-shikast-e-jam bhi beja nahin hue

hum zindagi ki jang mein haare zarur hain

lekin kisi mahaz se paspa nahin hue

insan hain ab to muddaton hum dewta rahe

shaklen nahin banin jo hayula nahin hue

Thahro abhi ye khel mukammal nahin hua

ji bhar ke hum tumhaara tamasha nahin hue

har sar se aasman ki chhat uTh nahin gai

kab tajrbe mein shahr ye sahra nahin hue

'shaukat' dayar-e-shauq ki raunaq unhi se hai

jo apni zat mein kabhi tanha nahin hue