bikti nahin faqir ki jholi hi kyun na ho

biktī nahīñ faqīr kī jholī hī kyuuñ na ho

chāhe ra.īs-e-shahr kī bolī hī kyuuñ na ho

ehsān-e-rañg ġhair uThāte nahīñ kabhī

apne lahū se khel vo holī hī kyuuñ na ho

sach to ye hai ki haath na aanā kamāl hai

duniyā se khel āñkh-micholī hī kyuuñ na ho

hai āsmāñ vasī.a zamīñ tañg hī sahī

ta.amīr kar kahīñ koī kholī hī kyuuñ na hū

haq par jo hai vahī sar o shāna buland hai

hai varna be-bisāt vo Tolī hī kyuuñ na ho

dariyā kī kyā bisāt ki mujh ko Dubo sake

kashtī kahīñ kahīñ mirī Dolī hī kyuuñ na ho

talḳhī meñ bhī maza hai jo tū ḳhush-mazāq hai

pak jaa.e to bhalī hai nimolī hī kyuuñ na ho

kuchh to hadīs 'ḳhair' samajhne ke kar jatan

har-chand be-maza mirī bolī hī kyuuñ na ho

bikti nahin faqir ki jholi hi kyun na ho

chahe rais-e-shahr ki boli hi kyun na ho

ehsan-e-rang ghair uThate nahin kabhi

apne lahu se khel wo holi hi kyun na ho

sach to ye hai ki hath na aana kamal hai

duniya se khel aankh-micholi hi kyun na ho

hai aasman wasia zamin tang hi sahi

tamir kar kahin koi kholi hi kyun na hu

haq par jo hai wahi sar o shana buland hai

hai warna be-bisat wo Toli hi kyun na ho

dariya ki kya bisat ki mujh ko Dubo sake

kashti kahin kahin meri Doli hi kyun na ho

talKHi mein bhi maza hai jo tu KHush-mazaq hai

pak jae to bhali hai nimoli hi kyun na ho

kuchh to hadis 'KHair' samajhne ke kar jatan

har-chand be-maza meri boli hi kyun na ho