بجھ جائے جو دل نغز بیانی نہیں رہتی

بجھ جائے جو دل نغز بیانی نہیں رہتی

سوکھے ہوئے دریا میں روانی نہیں رہتی

کر سکتے نہیں ہم نیا انداز ہی پیدا

قائم بھی روش اپنی پرانی نہیں رہتی

رات آنکھوں ہی آنکھوں میں گزر جاتی ہے ایسے

جب صبح نکلتی ہے سہانی نہیں رہتی

سنجیدہ ضعیفی کا اسے مقبرہ کہیے

جس جسم میں شوریدہ جوانی نہیں رہتی

جب بولنے لگتی ہے نظر اس کی فصاحت

یاروں کی ہمارے ہمہ دانی نہیں رہتی

ہو شعر زباں زد تو کوئی واقعہ ہوگا

یادوں میں فقط کوئی کہانی نہیں رہتی

پاتا ہوں پنپتے ہوئے شوکتؔ جو بدی کو

نیکی سے مری نیک گمانی نہیں رہتی