bulawa aa chuka chalna to hoga

bulāvā aa chukā chalnā to hogā

badan ko ḳhaak meñ Dhalnā to hogā

na maiñ muusā na ibrāhīm jaisā

kiyā hai 'ishq to jalnā to hogā

zarā sī der ruknā hai yahāñ par

na.ī phir raah par chalnā to hogā

mire jaane kā mat afsos karnā

maiñ sūraj huuñ mujhe Dhalnā to hogā

vo jis ne tujh ko pā kar kho diyā ho

use hāthoñ ko phir malnā to hogā

mayassar jis ko terā dil nahīñ hai

kahīñ is dukh ko phir palnā to hogā

du'ā meñ merī aa.heñ bhī haiñ shāmil

'ḳhizar' taqdīr ko Talnā to hogā

bulawa aa chuka chalna to hoga

badan ko KHak mein Dhalna to hoga

na main musa na ibrahim jaisa

kiya hai 'ishq to jalna to hoga

zara si der rukna hai yahan par

nai phir rah par chalna to hoga

mere jaane ka mat afsos karna

main suraj hun mujhe Dhalna to hoga

wo jis ne tujh ko pa kar kho diya ho

use hathon ko phir malna to hoga

mayassar jis ko tera dil nahin hai

kahin is dukh ko phir palna to hoga

du'a mein meri aahen bhi hain shamil

'KHizar' taqdir ko Talna to hoga