بلاوا آ چکا چلنا تو ہوگا

بلاوا آ چکا چلنا تو ہوگا

بدن کو خاک میں ڈھلنا تو ہوگا

نہ میں موسیٰ نہ ابراہیمؔ جیسا

کیا ہے عشق تو جلنا تو ہوگا

ذرا سی دیر رکنا ہے یہاں پر

نئی پھر راہ پر چلنا تو ہوگا

مرے جانے کا مت افسوس کرنا

میں سورج ہوں مجھے ڈھلنا تو ہوگا

وہ جس نے تجھ کو پا کر کھو دیا ہو

اسے ہاتھوں کو پھر ملنا تو ہوگا

میسر جس کو تیرا دل نہیں ہے

کہیں اس دکھ کو پھر پلنا تو ہوگا

دعا میں میری آہیں بھی ہیں شامل

خضرؔ تقدیر کو ٹلنا تو ہوگا