bund pani ko mera shahr taras jata hai

buuñd paanī ko mirā shahr taras jaatā hai

aur bādal hai ki dariyā pe baras jaatā hai

ātishīñ dhuup se miltī hai kabhī jis ko numū

vahī paudā kabhī bārish se jhulas jaatā hai

raah tashkīl vo arbāb-e-vafā ne kī thī

ab jahāñ qāfila-e-ahl-e-havas jaatā hai

ho chukī bū-e-vafā shahr se ruḳhsat kab kī

koī din hai ki phaloñ meñ se bhī ras jaatā hai

aadmī par vo kaḌā vaqt bhī aatā hai ki jab

saañs lene pas-e-dīvār-e-qafas jaatā hai

tum bhare shahr meñ kis Dhañg se rahte ho 'nasīm'

goyā vīrāne meñ jā kar koī bas jaatā hai

bund pani ko mera shahr taras jata hai

aur baadal hai ki dariya pe baras jata hai

aatishin dhup se milti hai kabhi jis ko numu

wahi pauda kabhi barish se jhulas jata hai

rah tashkil wo arbab-e-wafa ne ki thi

ab jahan qafila-e-ahl-e-hawas jata hai

ho chuki bu-e-wafa shahr se ruKHsat kab ki

koi din hai ki phalon mein se bhi ras jata hai

aadmi par wo kaDa waqt bhi aata hai ki jab

sans lene pas-e-diwar-e-qafas jata hai

tum bhare shahr mein kis Dhang se rahte ho 'nasim'

goya virane mein ja kar koi bas jata hai