chaak par miTTi ko mar jaana hai

chaak par miTTī ko mar jaanā hai

ḳhvāb-e-ta.amīr bikhar jaanā hai

ham ko us dasht meñ jaanā hogā

vahshatoñ kā yahī harjānā hai

sāhibo ham haiñ usī saf ke log

jin se sahrā ko sañvar jaanā hai

sāmne hashr kī had hai sāhab

ab hameñ lauT ke ghar jaanā hai

qabr-gāh haiñ sadāoñ kī yahāñ

bas yahīñ ham ko bhī mar jaanā hai

tum ko khone kā tumheñ paane kā

ham ne har qism kā Dar jaanā hai

koī bhī raah nahīñ hai us tak

ham ko ma.alūm hai par jaanā hai

lo nazar aane lagā us kā hashr

qāfile vaalo Thahar jaanā hai

kis liye tairnā ashkoñ meñ sadā

ab tah-e-dīda-e-tar jaanā hai

vo 'dinesh' us kī galī hai aage

dekh lo tum ko kidhar jaanā hai

chaak par miTTi ko mar jaana hai

KHwab-e-tamir bikhar jaana hai

hum ko us dasht mein jaana hoga

wahshaton ka yahi harjaana hai

sahibo hum hain usi saf ke log

jin se sahra ko sanwar jaana hai

samne hashr ki had hai sahab

ab hamein lauT ke ghar jaana hai

qabr-gah hain sadaon ki yahan

bas yahin hum ko bhi mar jaana hai

tum ko khone ka tumhein pane ka

hum ne har qism ka Dar jaana hai

koi bhi rah nahin hai us tak

hum ko malum hai par jaana hai

lo nazar aane laga us ka hashr

qafile walo Thahar jaana hai

kis liye tairna ashkon mein sada

ab tah-e-dida-e-tar jaana hai

wo 'dinesh' us ki gali hai aage

dekh lo tum ko kidhar jaana hai