chand suraj koi aKHtar nahin dekha humne

chāñd sūraj koī aḳhtar nahīñ dekhā ham ne

aap ke jaisā munavvar nahīñ dekhā ham ne

tujh se bichhḌe to kabhī ghar nahīñ dekhā ham ne

apne saa.e ko bhī muḌ kar nahīñ dekhā ham ne

ham ko mā'lūm nahīñ hotā hai kaisā darpan

aaj tak apnā bhī paikar nahīñ dekhā ham ne

fazl par us ke bharosa thā magar ḳhud pe na thā

so gunāhoñ kā koī dar nahīñ dekhā ham ne

chiil kavve to bahut dekhe tirī bastī meñ

amn kā koī kabūtar nahīñ dekhā ham ne

ik nazar paḌte hī ye tāb-e-nazāra bhī ga.ī

is liye us ko mukarrar nahīñ dekhā ham ne

log paḌh lete haiñ chehre pe likhī hasrat ko

ik nazar dekhā barābar nahīñ dekhā ham ne

baat karnā to bahut duur hai 'dānish' us ko

aañkh bhar kar kabhī dam bhar nahīñ dekhā ham ne

chand suraj koi aKHtar nahin dekha hum ne

aap ke jaisa munawwar nahin dekha hum ne

tujh se bichhDe to kabhi ghar nahin dekha hum ne

apne sae ko bhi muD kar nahin dekha hum ne

hum ko ma'lum nahin hota hai kaisa darpan

aaj tak apna bhi paikar nahin dekha hum ne

fazl par us ke bharosa tha magar KHud pe na tha

so gunahon ka koi dar nahin dekha hum ne

chil kawwe to bahut dekhe teri basti mein

amn ka koi kabutar nahin dekha hum ne

ek nazar paDte hi ye tab-e-nazara bhi gai

is liye us ko mukarrar nahin dekha hum ne

log paDh lete hain chehre pe likhi hasrat ko

ek nazar dekha barabar nahin dekha hum ne

baat karna to bahut dur hai 'danish' us ko

aankh bhar kar kabhi dam bhar nahin dekha hum ne