chaar din aur hain yaron ke ye Dere yaro

chaar din aur haiñ yāroñ ke ye Dere yaaro

kal kisī aur ke hoñge ye basere yaaro

vaqt ke saath sabhī naqsh bhī miT jā.eñge

vaqt kī ret pe jo ham ne ukere yaaro

ye zar-o-māl jhagaḌte rahe ham jin ke liye

saath jā.eñge tumhāre na hī mere yaaro

aañkh chuñdhyā.ī chakā-chauñdh se kaale dhan kī

in ujāloñ se to behtar the añdhere yaaro

tum inheñ giit kaho nazm kaho yā ki ġhazal

maiñ ne kāġhaz pe kuchh aañsū haiñ bikhere yaaro

raat ḳhvāboñ meñ mahal Dher banātā hai 'sadā'

Dher ho jaate haiñ sab sub.h savere yaaro

chaar din aur hain yaron ke ye Dere yaro

kal kisi aur ke honge ye basere yaro

waqt ke sath sabhi naqsh bhi miT jaenge

waqt ki ret pe jo hum ne ukere yaro

ye zar-o-mal jhagaDte rahe hum jin ke liye

sath jaenge tumhaare na hi mere yaro

aankh chundhyai chaka-chaundh se kale dhan ki

in ujalon se to behtar the andhere yaro

tum inhen git kaho nazm kaho ya ki ghazal

main ne kaghaz pe kuchh aansu hain bikhere yaro

raat KHwabon mein mahal Dher banata hai 'sada'

Dher ho jate hain sab subh sawere yaro