چار دن اور ہیں یاروں کے یہ ڈیرے یارو

چار دن اور ہیں یاروں کے یہ ڈیرے یارو

کل کسی اور کے ہوں گے یہ بسیرے یارو

وقت کے ساتھ سبھی نقش بھی مٹ جائیں گے

وقت کی ریت پہ جو ہم نے اکیرے یارو

یہ زر و مال جھگڑتے رہے ہم جن کے لیے

ساتھ جائیں گے تمہارے نہ ہی میرے یارو

آنکھ چندھیائی چکا چوندھ سے کالے دھن کی

ان اجالوں سے تو بہتر تھے اندھیرے یارو

تم انہیں گیت کہو نظم کہو یا کہ غزل

میں نے کاغذ پہ کچھ آنسو ہیں بکھیرے یارو

رات خوابوں میں محل ڈھیر بناتا ہے صداؔ

ڈھیر ہو جاتے ہیں سب صبح سویرے یارو