chal diya wo us tarah mujhko pareshan chhoD kar

chal diyā vo us tarah mujh ko pareshāñ chhoḌ kar

mausam-e-gul jaise jaa.e hai gulsitāñ chhoḌ kar

go bharosā hai mujhe apne ḳhulūs-e-shauq par

kaun aa.egā yahāñ jashn-e-bahārāñ chhoḌ kar

vo jo apne saath laayā thā gulsitāñ kī bahār

jā rahā hai ab kahāñ vo ghar ko vīrāñ chhoḌ kar

yuuñ lagā mujh ko ki goyā hashr barpā ho gayā

yak-ba-yak vo chal diyā merā shabistāñ chhoḌ kar

mujh ko shauq-e-husn meñ tahzīb hāzir chāhiye

gulsitāñ meñ aa gayā huuñ maiñ bayābāñ chhoḌ kar

lāla-o-gul meñ ayaañ haiñ husn-e-fitrat ke rumūz

mutma.in huuñ ishq meñ dasht-o-bayābāñ chhoḌ kar

yuuñ sar-e-mahfil vaqār-e-husn ko rusvā na kar

us kā dāman thaam le apnā garebāñ chhoḌ kar

jī rahā huuñ rashk ke māhaul meñ kuchh is tarah

jis tarah yūsuf gayā thā arz-e-kan.āñ chhoḌ kar

maiñ ne ḳhud us ke tasavvur ko bulāyā hai yahāñ

ab nahīñ jā.ūñgā bāhar ghar meñ mehmāñ chhoḌ kar

ho gayā paidā nizām-e-gul meñ behad intishār

jab gayā gulshan meñ vo zulfeñ pareshāñ chhoḌ kar

sozish-e-ulfat mujhe matlūb hai bahr-e-hayāt

ho gayā huuñ mutma.in maiñ rasm-e-darmāñ chhoḌ kar

kis qadar zabt-e-junūñ ne kar diyā hai hoshiyār

dāman-e-ummīd thāmā hai garebāñ chhoḌ kar

maiñ talāsh-e-husn se aisā huā huuñ munsalik

jā rahā huuñ zindagī kā sāz-o-sāmāñ chhoḌ kar

chal diya wo us tarah mujh ko pareshan chhoD kar

mausam-e-gul jaise jae hai gulsitan chhoD kar

go bharosa hai mujhe apne KHulus-e-shauq par

kaun aaega yahan jashn-e-bahaaran chhoD kar

wo jo apne sath laya tha gulsitan ki bahaar

ja raha hai ab kahan wo ghar ko viran chhoD kar

yun laga mujh ko ki goya hashr barpa ho gaya

yak-ba-yak wo chal diya mera shabistan chhoD kar

mujh ko shauq-e-husn mein tahzib hazir chahiye

gulsitan mein aa gaya hun main bayaban chhoD kar

lala-o-gul mein ayan hain husn-e-fitrat ke rumuz

mutmain hun ishq mein dasht-o-bayaban chhoD kar

yun sar-e-mahfil waqar-e-husn ko ruswa na kar

us ka daman tham le apna gareban chhoD kar

ji raha hun rashk ke mahaul mein kuchh is tarah

jis tarah yusuf gaya tha arz-e-kanan chhoD kar

main ne KHud us ke tasawwur ko bulaya hai yahan

ab nahin jaunga bahar ghar mein mehman chhoD kar

ho gaya paida nizam-e-gul mein behad intishaar

jab gaya gulshan mein wo zulfen pareshan chhoD kar

sozish-e-ulfat mujhe matlub hai bahr-e-hayat

ho gaya hun mutmain main rasm-e-darman chhoD kar

kis qadar zabt-e-junun ne kar diya hai hoshiyar

daman-e-ummid thama hai gareban chhoD kar

main talash-e-husn se aisa hua hun munsalik

ja raha hun zindagi ka saz-o-saman chhoD kar