chal rahe hain wo aisi shan se aaj

chal rahe haiñ vo aisī shaan se aaj

jaise aa.e hoñ āsmān se aaj

āstīñ meñ jo un kī thā kal tak

tiir niklā hai vo kamān se aaj

sham.a ke ird-gard parvāne

haath dho.eñ na apnī jaan se aaj

apnā sab kuchh luTā ke hosh aayā

shaiḳh-jī mil rahe haiñ ḳhaan se aaj

gul khilā.enge kyā abhī kuchh aur

lag rahe haiñ vo mehrbān se aaj

kar rahe haiñ jo vāda-e-fardā

phir ga.e apnī vo zabān se aaj

na miTā de vo un kā nām-o-nishāñ

aah niklī hai jo zabān se aaj

bhuul baiThe haiñ apnī jo auqāt

gir paḌeñ vo na āsmān se aaj

kah rahe haiñ vo aa ke 'barqī' se

jaao niklo mire makān se aaj

chal rahe hain wo aisi shan se aaj

jaise aae hon aasman se aaj

aastin mein jo un ki tha kal tak

tir nikla hai wo kaman se aaj

shama ke ird-gard parwane

hath dhoen na apni jaan se aaj

apna sab kuchh luTa ke hosh aaya

shaiKH-ji mil rahe hain KHan se aaj

gul khilaenge kya abhi kuchh aur

lag rahe hain wo mehrban se aaj

kar rahe hain jo wada-e-farda

phir gae apni wo zaban se aaj

na miTa de wo un ka nam-o-nishan

aah nikli hai jo zaban se aaj

bhul baiThe hain apni jo auqat

gir paDen wo na aasman se aaj

kah rahe hain wo aa ke 'barqi' se

jao niklo mere makan se aaj