chale chalo ki Thaharne ka ye maqam nahin

chale chalo ki Thaharne kā ye maqām nahīñ

kisī bhī manzil-e-maqsūd ko davām nahīñ

balā-kashī meñ mirī haath mausamoñ kā bhī hai

shikast-e-tauba faqat e'tibār-e-jām nahīñ

gharauñde ret ke ban ban ke miTte jaate haiñ

gumān-e-ḳhām-ḳhayālī ḳhayāl-e-ḳhām nahīñ

na gesuoñ hī kī chhāñv na 'ārizoñ hī kī dhuup

ye sub.h sub.h nahīñ hai ye shaam shaam nahīñ

zamāna-sāzī-e-insān-dushmanī tauba

ravāj-o-rasm-e-mohabbat kā ehtirām nahīñ

ḳhalā se tā-ba-ḳhalā kor-chashm añdhere haiñ

yahāñ bhī jashn-e-charāġhāñ kā ehtimām nahīñ

kashāñ kashāñ chalā aayā huuñ un ke dar pe 'ziyā'

ab un se kaise kahūñ mujh ko un se kaam nahīñ

chale chalo ki Thaharne ka ye maqam nahin

kisi bhi manzil-e-maqsud ko dawam nahin

bala-kashi mein meri hath mausamon ka bhi hai

shikast-e-tauba faqat e'tibar-e-jam nahin

gharaunde ret ke ban ban ke miTte jate hain

guman-e-KHam-KHayali KHayal-e-KHam nahin

na gesuon hi ki chhanw na 'arizon hi ki dhup

ye subh subh nahin hai ye sham sham nahin

zamana-sazi-e-insan-dushmani tauba

rawaj-o-rasm-e-mohabbat ka ehtiram nahin

KHala se ta-ba-KHala kor-chashm andhere hain

yahan bhi jashn-e-charaghan ka ehtimam nahin

kashan kashan chala aaya hun un ke dar pe 'ziya'

ab un se kaise kahun mujh ko un se kaam nahin