chalegi na ai dil koi ghat hargiz

chalegī na ai dil koī ghaat hargiz

nahīñ un se hogī mulāqāt hargiz

bahut koshish-e-zabt kī ham ne lekin

Thaharte nahīñ dil meñ jazbāt hargiz

tū buqrāt-e-daurāñ hai nāseh magar ham

suneñge na tere maqālāt hargiz

jo jāñ-bāziyoñ kī chale chaal us ko

bisāt-e-vafā par na ho maat hargiz

umīdoñ ke jugnū chamakte haiñ lekin

na Thahreñge dam bhar ye lam.āt hargiz

hai kyā ziist kyā hāsil-e-zindagī hai

nahīñ hote hal pe savālāt hargiz

vo chamkā kareñ laakh par ho sakeñge

muqābil na sūraj ke zarrāt hargiz

hamārā hai haqq-e-vafā deñ na deñ par

na māñgeñge ham un se ḳhairāt hargiz

tan-āsāno ulfat se baaz aao tum se

uTheñge na ġham ke su.ūbāt hargiz

nakīrain aa.e haiñ kuchh kah ke Taalo

Taleñge na varna ye hazrāt hargiz

ġhalat baat hai par ye lagtā hai jaise

kaTegī na ab hijr kī raat hargiz

na ghabrāo tum aarzī haiñ ye aañsū

musalsal na hogī ye barsāt hargiz

ziyāñ bhī uThā.e haiñ par ham ne yaaro

nahīñ dil meñ rakkhī koī baat hargiz

vo guzrī hai ham par jo majnūñ pe guzrī

badalte nahīñ ġham ke hālāt hargiz

dil-e-'kaif' hai ik rabāb-e-shikasta

uTheñge na ab is se naġhmāt hargiz

chalegi na ai dil koi ghat hargiz

nahin un se hogi mulaqat hargiz

bahut koshish-e-zabt ki hum ne lekin

Thaharte nahin dil mein jazbaat hargiz

tu buqraat-e-dauran hai naseh magar hum

sunenge na tere maqalat hargiz

jo jaan-baziyon ki chale chaal us ko

bisat-e-wafa par na ho mat hargiz

umidon ke jugnu chamakte hain lekin

na Thahrenge dam bhar ye lamat hargiz

hai kya zist kya hasil-e-zindagi hai

nahin hote hal pe sawalat hargiz

wo chamka karen lakh par ho sakenge

muqabil na suraj ke zarraat hargiz

hamara hai haqq-e-wafa den na den par

na mangenge hum un se KHairaat hargiz

tan-asano ulfat se baz aao tum se

uThenge na gham ke suubaat hargiz

nakirain aae hain kuchh kah ke Talo

Talenge na warna ye hazraat hargiz

ghalat baat hai par ye lagta hai jaise

kaTegi na ab hijr ki raat hargiz

na ghabrao tum aarzi hain ye aansu

musalsal na hogi ye barsat hargiz

ziyan bhi uThae hain par hum ne yaro

nahin dil mein rakkhi koi baat hargiz

wo guzri hai hum par jo majnun pe guzri

badalte nahin gham ke haalat hargiz

dil-e-'kaif' hai ek rabab-e-shikasta

uThenge na ab is se naghmat hargiz