chamakne laga hai tera gham bahut

chamakne lagā hai tirā ġham bahut

diye ho chale ab to maddham bahut

ghaTāoñ meñ tūfāñ ke āsār haiñ

tirī zulf hai aaj barham bahut

yahāñ lahlahā.e haiñ ashkoñ meñ baaġh

na itrā.e phūloñ pe shabnam bahut

ye vo daur hai jis kā darmāñ nahīñ

ye vo raaz hai jis ke mahram bahut

ye dāmān-e-vahshat kī kuchh dhajjiyāñ

banā.eñge log in se parcham bahut

gadā-e-mohabbat kī ḳhuddāriyāñ

mile raah meñ ḳhusrav-o-jam bahut

sulagtī rahī raat bhar chāñdnī

shab-e-hijr thī raushnī kam bahut

na jā.egī dil se kabhī aarzū

ye buniyād hai āh-e-mohkam bahut

chamakne laga hai tera gham bahut

diye ho chale ab to maddham bahut

ghaTaon mein tufan ke aasar hain

teri zulf hai aaj barham bahut

yahan lahlahae hain ashkon mein bagh

na itrae phulon pe shabnam bahut

ye wo daur hai jis ka darman nahin

ye wo raaz hai jis ke mahram bahut

ye daman-e-wahshat ki kuchh dhajjiyan

banaenge log in se parcham bahut

gada-e-mohabbat ki KHuddariyan

mile rah mein KHusraw-o-jam bahut

sulagti rahi raat bhar chandni

shab-e-hijr thi raushni kam bahut

na jaegi dil se kabhi aarzu

ye buniyaad hai aah-e-mohkam bahut