chaman aab-e-tariqat se hamein dhona paDega

chaman āb-e-tarīqat se hameñ dhonā paḌegā

koī ik biij pākīza kahīñ bonā paḌegā

mohabbat meñ aziyyat kā 'ajab ye marhala hai

jise paayā nahīñ ab tak use khonā paḌegā

hamāre darmiyāñ qaa.im rahegī ajnabiyyat

magar mujh ko tirā tujh ko mirā honā paḌegā

vufūr-e-shauq ne rakkhā hameñ sargarm varna

thakan to mustaqil kahtī rahī sonā paḌegā

hamāre sar pe gaThrī hai ga.e-guzre dinoñ kī

hameñ ye bojh yūñhī 'umr bhar Dhonā paḌegā

gurezāñ huuñ magar tū hī batā āḳhir kahāñ tak

tirī tanhā.ī meñ ik din muḳhil honā paḌegā

latīfa-go hai raavī aur kahānī karbiya hai

to kyā 'āsim' hameñ hañste hue ronā paḌegā

chaman aab-e-tariqat se hamein dhona paDega

koi ek bij pakiza kahin bona paDega

mohabbat mein aziyyat ka 'ajab ye marhala hai

jise paya nahin ab tak use khona paDega

hamare darmiyan qaim rahegi ajnabiyyat

magar mujh ko tera tujh ko mera hona paDega

wufur-e-shauq ne rakkha hamein sargarm warna

thakan to mustaqil kahti rahi sona paDega

hamare sar pe gaThri hai gae-guzre dinon ki

hamein ye bojh yunhi 'umr bhar Dhona paDega

gurezan hun magar tu hi bata aaKHir kahan tak

teri tanhai mein ek din muKHil hona paDega

latifa-go hai rawi aur kahani karbiya hai

to kya 'asim' hamein hanste hue rona paDega