chaman hans paDa gul khile ja rahe hain

chaman hañs paḌā gul khile jā rahe haiñ

bahār aa rahī hai ki vo aa rahe haiñ

ġhazab thā jise ik nazar dekh lenā

use dekhne aaj ham jā rahe haiñ

ye un kī navāzish hai kis tarh bhūlūñ

bhulātā huuñ phir bhī vo yaad aa rahe haiñ

sitam par nuzūl-e-sitam hai ye kaisā

abhī aa.e the vo abhī jā rahe haiñ

baḌhegā mirā dard-e-dil aur is se

vo kyoñ pursish-e-hāl farmā rahe haiñ

adā chhup ke aane kī pahuñchī kahāñ tak

vo ḳhud mujh se bhī ab chhupe jā rahe haiñ

tire daur-e-furqat meñ ye bhī bahut hai

tirī yaad se dil ko bahlā rahe haiñ

vo rasm-e-qadīm un kī jaarī hai ab bhī

jo taḌpā rahe the vo taḌpā rahe haiñ

barābar hai us kā ye paanā na paanā

jise pā ke ham aap kho jā rahe haiñ

tilism-e-tamāshā hai un kā tasavvur

jidhar jā rahe haiñ unheñ pā rahe haiñ

vo hañste haiñ dete nahīñ bosa-e-lab

pilāte nahīñ jaam chhalkā rahe haiñ

'junūñ' un ke gesū hoñ yā un ke 'āriz

sab apne ḳhayāloñ meñ uljhā rahe haiñ

chaman hans paDa gul khile ja rahe hain

bahaar aa rahi hai ki wo aa rahe hain

ghazab tha jise ek nazar dekh lena

use dekhne aaj hum ja rahe hain

ye un ki nawazish hai kis tarh bhulun

bhulata hun phir bhi wo yaad aa rahe hain

sitam par nuzul-e-sitam hai ye kaisa

abhi aae the wo abhi ja rahe hain

baDhega mera dard-e-dil aur is se

wo kyon pursish-e-haal farma rahe hain

ada chhup ke aane ki pahunchi kahan tak

wo KHud mujh se bhi ab chhupe ja rahe hain

tere daur-e-furqat mein ye bhi bahut hai

teri yaad se dil ko bahla rahe hain

wo rasm-e-qadim un ki jari hai ab bhi

jo taDpa rahe the wo taDpa rahe hain

barabar hai us ka ye pana na pana

jise pa ke hum aap kho ja rahe hain

tilism-e-tamasha hai un ka tasawwur

jidhar ja rahe hain unhen pa rahe hain

wo hanste hain dete nahin bosa-e-lab

pilate nahin jam chhalka rahe hain

'junun' un ke gesu hon ya un ke 'ariz

sab apne KHayalon mein uljha rahe hain