chaman mein aap ki tarah gulab ek bhi nahin

chaman meñ aap kī tarah gulāb ek bhī nahīñ

huzūr ek bhī nahīñ janāb ek bhī nahīñ

hamārī sarguzasht meñ hazāroñ vāqi'āt haiñ

magar jo dekhte rahe vo ḳhvāb ek bhī nahīñ

ziyāfatoñ meñ aaj kal rivāj-e-sarḳhushī kahāñ

kuchh aur pī rahe haiñ sab sharāb ek bhī nahīñ

idhar kisī se kuchh liyā udhar kisī ko de diyā

chunāñche vājib-ul-adā hisāb ek bhī nahīñ

kutub ke Dher meñ na ho sahīfa zikr-e-yār kā

to qābil-e-mutāle’a kitāb ek bhī nahīñ

qavī bhī hai za'īf bhī hamārā hāfiza 'sha'ūr'

maze tamām yaad haiñ 'azāb ek bhī nahīñ

chaman mein aap ki tarah gulab ek bhi nahin

huzur ek bhi nahin janab ek bhi nahin

hamari sarguzasht mein hazaron waqi'at hain

magar jo dekhte rahe wo KHwab ek bhi nahin

ziyafaton mein aaj kal riwaj-e-sarKHushi kahan

kuchh aur pi rahe hain sab sharab ek bhi nahin

idhar kisi se kuchh liya udhar kisi ko de diya

chunanche wajib-ul-ada hisab ek bhi nahin

kutub ke Dher mein na ho sahifa zikr-e-yar ka

to qabil-e-mutale’a kitab ek bhi nahin

qawi bhi hai za'if bhi hamara hafiza 'sha'ur'

maze tamam yaad hain 'azab ek bhi nahin