چمن میں آپ کی طرح گلاب ایک بھی نہیں

چمن میں آپ کی طرح گلاب ایک بھی نہیں

حضور ایک بھی نہیں جناب ایک بھی نہیں

ہماری سرگزشت میں ہزاروں واقعات ہیں

مگر جو دیکھتے رہے وہ خواب ایک بھی نہیں

ضیافتوں میں آج کل رواج سرخوشی کہاں

کچھ اور پی رہے ہیں سب شراب ایک بھی نہیں

ادھر کسی سے کچھ لیا ادھر کسی کو دے دیا

چنانچہ واجب الادا حساب ایک بھی نہیں

کتب کے ڈھیر میں نہ ہو صحیفہ ذکر یار کا

تو قابل مطالعہ کتاب ایک بھی نہیں

قوی بھی ہے ضعیف بھی ہمارا حافظہ شعورؔ

مزے تمام یاد ہیں عذاب ایک بھی نہیں