chaman walo haqiqat humse batlai nahin jati

chaman vaalo haqīqat ham se batlā.ī nahīñ jaatī

guloñ ke dil pe jo biitī vo samjhā.ī nahīñ jaatī

chaman kā husn bil-āḳhir guloñ kī aabrū Thahrā

ye izzat shāh-rāh-e-ām pe laa.ī nahīñ jaatī

ġham-e-daurāñ kī uljhan ho ki vahshat ho mohabbat kī

shikasta dil kī hālat bar-zabāñ laa.ī nahīñ jaatī

are kam-zarf mai-noshī kā ye koī salīqa hai

sar-e-mahfil mai-e-gul-rañg chhalkā.ī nahīñ jaatī

sajā detā huuñ ḳhvāboñ ke dar-o-dīvār pe us ko

vo ik shai jo kisī sūrat se apnā.ī nahīñ jaatī

na pūchho kyā nigāh-e-nāz ne dil par asar chhoḌā

ġhazal ke sher meñ tāsīr vo laa.ī nahīñ jaatī

hujūm-e-shahr ho 'ārif' ki apne ghar kī ḳhalvat ho

nahīñ jaatī magar apnī ye tanhā.ī nahīñ jaatī

chaman walo haqiqat hum se batlai nahin jati

gulon ke dil pe jo biti wo samjhai nahin jati

chaman ka husn bil-aKHir gulon ki aabru Thahra

ye izzat shah-rah-e-am pe lai nahin jati

gham-e-dauran ki uljhan ho ki wahshat ho mohabbat ki

shikasta dil ki haalat bar-zaban lai nahin jati

are kam-zarf mai-noshi ka ye koi saliqa hai

sar-e-mahfil mai-e-gul-rang chhalkai nahin jati

saja deta hun KHwabon ke dar-o-diwar pe us ko

wo ek shai jo kisi surat se apnai nahin jati

na puchho kya nigah-e-naz ne dil par asar chhoDa

ghazal ke sher mein tasir wo lai nahin jati

hujum-e-shahr ho 'arif' ki apne ghar ki KHalwat ho

nahin jati magar apni ye tanhai nahin jati