charagh shahr-e-wafa ke bujha diye kis ne

charāġh shahr-e-vafā ke bujhā diye kis ne

ye iḳhtilāf ke sho'le sajā diye kis ne

shikast-e-dil kā agar hādisa nahīñ guzrā

unheñ vafā ke salīqe sikhā diye kis ne

mahakte phuul the har rāhbar ke hāthoñ meñ

hamārī raah meñ kāñTe bichhā diye kis ne

añdhere phail ga.e nafratoñ ke donoñ taraf

charāġh dair-o-haram ke bujhā diye kis ne

na zalzala hai na tūfān hai na āñdhī hai

to phir daraḳht achānak girā diye kis ne

jo sang-e-mīl pata manziloñ kā dete the

hamārī rāhguzar se haTā diye kis ne

tamām 'umr kā sarmāya luT gayā 'razmī'

ḳhutūt un ke chhupā kar jalā diye kis ne

charagh shahr-e-wafa ke bujha diye kis ne

ye iKHtilaf ke sho'le saja diye kis ne

shikast-e-dil ka agar hadisa nahin guzra

unhen wafa ke saliqe sikha diye kis ne

mahakte phul the har rahbar ke hathon mein

hamari rah mein kanTe bichha diye kis ne

andhere phail gae nafraton ke donon taraf

charagh dair-o-haram ke bujha diye kis ne

na zalzala hai na tufan hai na aandhi hai

to phir daraKHt achanak gira diye kis ne

jo sang-e-mil pata manzilon ka dete the

hamari rahguzar se haTa diye kis ne

tamam 'umr ka sarmaya luT gaya 'razmi'

KHutut un ke chhupa kar jala diye kis ne