charagh zulmat-e-be-nur mein jalana tera

charāġh zulmat-e-be-nūr meñ jalānā tirā

pasand aayā na logoñ ko āstāna tirā

yūñhī guzāroge tum arsa-e-hayāt agar

na hogā ek bhī pal koī jāvedāna tirā

bahut qarīb se maiñ tujh ko jāntā huuñ miyāñ

har ek ḳhuub samajhtā huuñ maiñ bahāna tirā

hameñ banāoge jis vaqt lashkarī apnā

ḳhatā na hogā kisī taur bhī nishāna tirā

na koī tujh ko bachā.egā qatl hone se

paḌheñge log janāza bhī ġhā.ebāna tirā

na degā koī bhī mushkil ghaḌī meñ saath tirā

agarche aaj ye girvīda hai zamāna tirā

sivā.e ek kafan ke na kuchh milegā tujhe

kisī bhī kaam na aa.egā ye ḳhazāna tirā

ise badalnā hai ik roz ḳhaak meñ āḳhir

sajā ke rakkhegā jo bhī nigār-ḳhāna tirā

'nabīl' is ke sivā aur kyā diyā tum ne

hamārī piiTh hai aur dost tāziyāna tirā

charagh zulmat-e-be-nur mein jalana tera

pasand aaya na logon ko aastana tera

yunhi guzaroge tum arsa-e-hayat agar

na hoga ek bhi pal koi jawedana tera

bahut qarib se main tujh ko jaanta hun miyan

har ek KHub samajhta hun main bahana tera

hamein banaoge jis waqt lashkari apna

KHata na hoga kisi taur bhi nishana tera

na koi tujh ko bachaega qatl hone se

paDhenge log janaza bhi ghaebana tera

na dega koi bhi mushkil ghaDi mein sath tera

agarche aaj ye girwida hai zamana tera

siwae ek kafan ke na kuchh milega tujhe

kisi bhi kaam na aaega ye KHazana tera

ise badalna hai ek roz KHak mein aaKHir

saja ke rakkhega jo bhi nigar-KHana tera

'nabil' is ke siwa aur kya diya tum ne

hamari piTh hai aur dost taziyana tera