chashm-e-fusūñ-navāz kyoñ ishva sitam-tarāz kyoñ
ham to haiñ tere mubtalā sheva-e-hīlā-sāz kyoñ
lutf-o-karam kā hausla ġhairoñ se sāz-bāz kyoñ
mujh se ḳhafā ḳhafā sī hai terī nigāh-e-nāz kyoñ
shabnam-sifat karam tirā har shai pe jo baras ga.ī
ham bhī haiñ terī bazm meñ ham se hī ehtirāz kyoñ
yuuñ ġhairiyat ko aur bhī rāheñ hazār thiiñ magar
tark-e-ta.alluqāt ko jurm-e-vafā javāz kyoñ
bhūlā kabhī na rāsta un kī galī kā qais haif
rusvā.iyoñ ke ḳhauf se dīvāngī majāz kyoñ
majrūh-e-ishva-e-adā dil hai vo kaun jo nahīñ
nashtar-navāz us pe hai terī nigāh-e-nāz kyoñ
har jā haqīqī ishq meñ jalva ḳhudā kā hai ayaañ
mahmūd jis pe thā fidā vo aur thā ayaaz kyoñ
takmīl shauq-e-dīd kī mahshar pe kyoñ hai munhasir
itnī sī baat ke liye mahshar ai ġham-navāz kyoñ
sach hai sanam-kadoñ kā to har but hī sang hai 'vahīd'
phir bhī butoñ ke sāmne ḳham hai sar-e-niyāz kyoñ
chashm-e-fusun-nawaz kyon ishwa sitam-taraaz kyon
hum to hain tere mubtala shewa-e-hila-saz kyon
lutf-o-karam ka hausla ghairon se saz-baz kyon
mujh se KHafa KHafa si hai teri nigah-e-naz kyon
shabnam-sifat karam tera har shai pe jo baras gai
hum bhi hain teri bazm mein hum se hi ehtiraaz kyon
yun ghairiyat ko aur bhi rahen hazar thin magar
tark-e-talluqat ko jurm-e-wafa jawaz kyon
bhula kabhi na rasta un ki gali ka qais haif
ruswaiyon ke KHauf se diwangi majaz kyon
majruh-e-ishwa-e-ada dil hai wo kaun jo nahin
nashtar-nawaz us pe hai teri nigah-e-naz kyon
har ja haqiqi ishq mein jalwa KHuda ka hai ayan
mahmud jis pe tha fida wo aur tha ayaz kyon
takmil shauq-e-did ki mahshar pe kyon hai munhasir
itni si baat ke liye mahshar ai gham-nawaz kyon
sach hai sanam-kadon ka to har but hi sang hai 'wahid'
phir bhi buton ke samne KHam hai sar-e-niyaz kyon
Source:
Yadon Ka Zindan (Pg. 39)
-
Author:
Waheed Arshi
-
- Publisher: Idara Makhdoom Jahan, New Delhi
- Year of Publication: 1991
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.