چشم فسوں نواز کیوں عشوہ ستم طراز کیوں

چشم فسوں نواز کیوں عشوہ ستم طراز کیوں

ہم تو ہیں تیرے مبتلا شیوۂ حیلہ ساز کیوں

لطف و کرم کا حوصلہ غیروں سے ساز باز کیوں

مجھ سے خفا خفا سی ہے تیری نگاہ ناز کیوں

شبنم صفت کرم ترا ہر شے پہ جو برس گئی

ہم بھی ہیں تیری بزم میں ہم سے ہی احتراز کیوں

یوں غیریت کو اور بھی راہیں ہزار تھیں مگر

ترک تعلقات کو جرم وفا جواز کیوں

بھولا کبھی نہ راستہ ان کی گلی کا قیس حیف

رسوائیوں کے خوف سے دیوانگی مجاز کیوں

مجروح عشوۂ ادا دل ہے وہ کون جو نہیں

نشتر نواز اس پہ ہے تیری نگاہ ناز کیوں

ہر جا حقیقی عشق میں جلوہ خدا کا ہے عیاں

محمود جس پہ تھا فدا وہ اور تھا ایاز کیوں

تکمیل شوق دید کی محشر پہ کیوں ہے منحصر

اتنی سی بات کے لئے محشر اے غم نواز کیوں

سچ ہے صنم کدوں کا تو ہر بت ہی سنگ ہے وحیدؔ

پھر بھی بتوں کے سامنے خم ہے سر نیاز کیوں