chehre pe intizar ki parchhaiyan milin

chehre pe intizār kī parchhā.iyāñ milīñ

ham chup the us ke baa'd bhī rusvā.iyāñ milīñ

aaya na raas ham ko samundar se bhāgnā

sāhil ke ās-pās bhī gahrā.iyāñ milīñ

barsoñ ke baa'd lauT ke aa.e jo gaañv ham

vo chāñdnī milī na vo añgnā.iyāñ milīñ

paanī pe tairtī thī hamārī ġhazal kabhī

Duube jo āñsuoñ meñ to gahrā.iyāñ milīñ

'qaisar' mire nasīb ke din bah ga.e kahāñ

paanī pe sirf shaam kī parchhā.iyāñ milīñ

chehre pe intizar ki parchhaiyan milin

hum chup the us ke ba'd bhi ruswaiyan milin

aaya na ras hum ko samundar se bhagna

sahil ke aas-pas bhi gahraiyan milin

barson ke ba'd lauT ke aae jo ganw hum

wo chandni mili na wo angnaiyan milin

pani pe tairti thi hamari ghazal kabhi

Dube jo aansuon mein to gahraiyan milin

'qaisar' mere nasib ke din bah gae kahan

pani pe sirf sham ki parchhaiyan milin