چھا گیا مستقلاً شب کا اندھیرا شاید

چھا گیا مستقلاً شب کا اندھیرا شاید

اب نہ ہوگا کبھی بستی میں سویرا شاید

ہاں ابھی وقت ہے کچھ فیض اٹھائے کوئی

پھر نہ ہو پائے گا اس جوگی کا پھیرا شاید

ناگ بے خوف و خطر پھرتے ہیں کوچہ کوچہ

بستیوں میں نہیں اب کوئی سپیرا شاید

مالک کون و مکاں کا جو کرم ہے سب پر

اس کی نظروں میں نہیں تیرا کہ میرا شاید

خیمہ زن رنج و الم یوں ہیں مرے سینے میں

زندگی بھر نہ اٹھائیں گے یہ ڈیرا شاید

نیند کو چھوڑ کر اب فکر سفر کر لاغرؔ

کوچ کرنے کو ہے اب تیرا بھی ڈیرا شاید