chhajje hain saeban hain aage baDhe hue

chhajje haiñ sā.ebān haiñ aage baḌhe hue

galiyoñ ke sab makān haiñ aage baḌhe hue

pasmāndgī avaam ke pīchhe paḌī huī

do-chār ḳhāndān haiñ aage baḌhe hue

rasta to ruk gayā hai sar-e-manzil-e-gumāñ

qadmoñ ke kuchh nishān haiñ aage baḌhe hue

gherā huā hai chāroñ taraf se zamīn ko

had se ye āsmān haiñ aage baḌhe hue

ḳhud chal ke aa gayā hai nishāna qarīb-tar

hairat se dīd-bān haiñ aage baḌhe hue

pīchhe kamān-dār pareshān hai bahut

palTan ke kuchh javān haiñ aage baḌhe hue

aayā huuñ dostoñ se mulāqāt ke liye

kyoñ tiir aur kamān haiñ aage baḌhe hue

aatā nahīñ shikār shikārī ke sāmne

jañgal se kuchh machān haiñ aage baḌhe hue

miTTī ke sab zurūf haiñ pīchhe rakhe hue

shīshe ke martabān haiñ aage baḌhe hue

chhajje hain saeban hain aage baDhe hue

galiyon ke sab makan hain aage baDhe hue

pasmandgi awam ke pichhe paDi hui

do-chaar KHandan hain aage baDhe hue

rasta to ruk gaya hai sar-e-manzil-e-guman

qadmon ke kuchh nishan hain aage baDhe hue

ghera hua hai chaaron taraf se zamin ko

had se ye aasman hain aage baDhe hue

KHud chal ke aa gaya hai nishana qarib-tar

hairat se did-ban hain aage baDhe hue

pichhe kaman-dar pareshan hai bahut

palTan ke kuchh jawan hain aage baDhe hue

aaya hun doston se mulaqat ke liye

kyon tir aur kaman hain aage baDhe hue

aata nahin shikar shikari ke samne

jangal se kuchh machan hain aage baDhe hue

miTTi ke sab zuruf hain pichhe rakhe hue

shishe ke martaban hain aage baDhe hue