chhin kar chehre se aasar-e-wafa le jaegi

chhīn kar chehre se āsār-e-vafā le jā.egī

ek āñdhī aa.egī saarī adā le jā.egī

jism-e-uryāñ Dhāñpne kā ye tamāshā bhī sanam

kal sahar jab aa.egī ye bhī adā le jā.egī

parbatoñ se aa rahī hai ek mauj-e-be-karāñ

jo hamāre shahr kī āb-o-havā le jā.egī

is añdherī raat kā aane kā andesha hai jo

aañkh kyā hai zehn-o-dil kī har ziyā le jā.egī

ghar ke darvāze darīche band rakkho ye havā

taaq par jo bhī diyā hai vo bujhā le jā.egī

jab nadī aa.egī bahtī zindagī ke saath saath

mere ghar meñ jo bhī shai hai vo uThā le jā.egī

ye dar-o-dīvār to rah jā.eñge lekin 'shamīm'

chhat makānoñ kī havā shāyad uḌā le jā.egī

chhin kar chehre se aasar-e-wafa le jaegi

ek aandhi aaegi sari ada le jaegi

jism-e-uryan Dhanpne ka ye tamasha bhi sanam

kal sahar jab aaegi ye bhi ada le jaegi

parbaton se aa rahi hai ek mauj-e-be-karan

jo hamare shahr ki aab-o-hawa le jaegi

is andheri raat ka aane ka andesha hai jo

aankh kya hai zehn-o-dil ki har ziya le jaegi

ghar ke darwaze dariche band rakkho ye hawa

taq par jo bhi diya hai wo bujha le jaegi

jab nadi aaegi bahti zindagi ke sath sath

mere ghar mein jo bhi shai hai wo uTha le jaegi

ye dar-o-diwar to rah jaenge lekin 'shamim'

chhat makanon ki hawa shayad uDa le jaegi