چھین کر چہرے سے آثار وفا لے جائے گی

چھین کر چہرے سے آثار وفا لے جائے گی

ایک آندھی آئے گی ساری ادا لے جائے گی

جسم عریاں ڈھانپنے کا یہ تماشا بھی صنم

کل سحر جب آئے گی یہ بھی ادا لے جائے گی

پربتوں سے آ رہی ہے ایک موج بے کراں

جو ہمارے شہر کی آب و ہوا لے جائے گی

اس اندھیری رات کا آنے کا اندیشہ ہے جو

آنکھ کیا ہے ذہن و دل کی ہر ضیا لے جائے گی

گھر کے دروازے دریچے بند رکھو یہ ہوا

طاق پر جو بھی دیا ہے وہ بجھا لے جائے گی

جب ندی آئے گی بہتی زندگی کے ساتھ ساتھ

میرے گھر میں جو بھی شے ہے وہ اٹھا لے جائے گی

یہ در و دیوار تو رہ جائیں گے لیکن شمیمؔ

چھت مکانوں کی ہوا شاید اڑا لے جائے گی