چھپ گئے سائے میں سائے میں اکیلا رہ گیا

چھپ گئے سائے میں سائے میں اکیلا رہ گیا

اتنے گہرے ابر چھائے میں اکیلا رہ گیا

میں اکیلا رہ گیا تو میں نے کچھ رشتے بنائے

میں نے کچھ رشتے بنائے میں اکیلا رہ گیا

حلقۂ احباب کی موجودگی میں یوں ہوا

ایک دن بیٹھے بٹھائے میں اکیلا رہ گیا

کتنا مشکل ہے اگر اس جدتوں کے دور میں

کوئی مجھ کو ڈھونڈ لائے میں اکیلا رہ گیا

روشنی کی زد میں ہے یا تیرگی کی قید میں

تو کہاں ہے میرے سائے میں اکیلا رہ گیا

آپ سے پہلے کم از کم میں تو اپنے پاس تھا

آپ اتنے پاس آئے میں اکیلا رہ گیا

یہ گوارا ہی نہیں جو خود اکیلا ہو اسے

رو کے بتلاؤں کہ ہائے میں اکیلا رہ گیا