choT gahri mujhe lagi to nahin

choT gahrī mujhe lagī to nahīñ

dil kī hālat kabhī chhupī to nahīñ

hāsil-e-nutq ḳhāmushī to nahīñ

kahīñ me.arāj-e-ġham yahī to nahīñ

shaad rahnā hī jaise bhuul ga.e

ashk piinā koī hañsī to nahīñ

phuul ko phuul kar diyā jis ne

ashk-e-shabnam kī tāzgī to nahīñ

ahl-e-duniyā kī sard-mehrī se

barf jazbāt par jamī to nahīñ

is zamāne meñ zindagī karnā

dosto koī dil-lagī to nahīñ

jo khaTaktī hai har jagah mujh ko

kahīñ terī hī vo kamī to nahīñ

sāmne un ke aur gustāḳhī

ġhalatī mujh se ye huī to nahīñ

sabab-e-nā-rasā.ī-e-manzil

apnī kotāh-himmatī to nahīñ

tum jise tīrgī samajhte ho

paas hī kī vo tīrgī to nahīñ

gumrahī meñ maze hoñ laakh magar

gumrahī manzil-āgahī to nahīñ

maiñ nahīñ shākī-e-ḳhamoshī-e-bazm

achchhe sheroñ pe daad bhī to nahīñ

shāyad aa jaa.eñ phuul phal is meñ

shāḳh-e-ummīd abhī jalī to nahīñ

ye ta.assub junūñ ye maz.hab kā

asl-e-īmān-o-āgahī to nahīñ

aa.e din fitne aur hangāme

ye siyāsat kī abtarī to nahīñ

sharpasandī kī āñdhiyoñ se bhī

shama-e-insāniyat bujhī to nahīñ

jis se rahtā huuñ rāt-din sarshār

ilm-o-fan kī ye be-ḳhudī to nahīñ

dost kyoñ dostī ko bhuul ga.e

dostī koī dushmanī to nahīñ

ye mazāq-e-jadīdiyat tauba

tab.a-e-shā.er kī ājizī to nahīñ

na zabāñ kā na kuchh bayān kā lutf

shā.erī aaj be-tukī to nahīñ

aam bāteñ ġhazal meñ kah dī haiñ

ham ne kuchh ḳhaas baat kī to nahīñ

is zamīñ meñ bhī sach batā 'maġhmūm'

tab.a terī kahīñ rukī to nahīñ

choT gahri mujhe lagi to nahin

dil ki haalat kabhi chhupi to nahin

hasil-e-nutq KHamushi to nahin

kahin mearaj-e-gham yahi to nahin

shad rahna hi jaise bhul gae

ashk pina koi hansi to nahin

phul ko phul kar diya jis ne

ashk-e-shabnam ki tazgi to nahin

ahl-e-duniya ki sard-mehri se

barf jazbaat par jami to nahin

is zamane mein zindagi karna

dosto koi dil-lagi to nahin

jo khaTakti hai har jagah mujh ko

kahin teri hi wo kami to nahin

samne un ke aur gustaKHi

ghalati mujh se ye hui to nahin

sabab-e-na-rasai-e-manzil

apni kotah-himmati to nahin

tum jise tirgi samajhte ho

pas hi ki wo tirgi to nahin

gumrahi mein maze hon lakh magar

gumrahi manzil-agahi to nahin

main nahin shaki-e-KHamoshi-e-bazm

achchhe sheron pe dad bhi to nahin

shayad aa jaen phul phal is mein

shaKH-e-ummid abhi jali to nahin

ye tassub junun ye mazhab ka

asl-e-iman-o-agahi to nahin

aae din fitne aur hangame

ye siyasat ki abtari to nahin

sharpasandi ki aandhiyon se bhi

shama-e-insaniyat bujhi to nahin

jis se rahta hun raat-din sarshaar

ilm-o-fan ki ye be-KHudi to nahin

dost kyon dosti ko bhul gae

dosti koi dushmani to nahin

ye mazaq-e-jadidiyat tauba

taba-e-shaer ki aajizi to nahin

na zaban ka na kuchh bayan ka lutf

shaeri aaj be-tuki to nahin

aam baaten ghazal mein kah di hain

hum ne kuchh KHas baat ki to nahin

is zamin mein bhi sach bata 'maghmum'

taba teri kahin ruki to nahin