chupke chupke ek to Tis aap jamani auron se

chupke chupke ek to Tiis aap jamānī auroñ se

tis ulTī ham ko tohmat aa ke lagānī auroñ se

ham se to bas bāñdhe rakhtī sharm kī paTTī āñkhoñ par

chorī chorī mahfil meñ par aañkh laḌānī auroñ se

auroñ ke to ham se na kahne ham se le kar jī kī baat

juuñ kī tuuñ sab baat ye kyuuñ jī jā ke sunānī auroñ se

mujh se kaho ho aaheñ bhar bhar huuk jigar meñ uThtī hai

aur yūñhī dar-parda apnī chaah jatānī auroñ se

lauñg khilā.eñ ham jo kabhī to us ko Daalo muñh se thuuk

aur ye kyuuñ jī roz mufārreh chhīñke khānī auroñ se

auroñ ke to ghar meñ jā kar dauḌ ke piinī aap sharāb

mere aage pī nahīñ sakte maañg ke paanī auroñ se

ham jo paḌheñ koī sher to kahnā sher se ham ko zauq nahīñ

'mīr'-hasan ke ghar meñ kahānī jā ke paḌhānī auroñ se

parda is meñ kyā hai pyāre duniyā meñ 'mārūf' hai ye

āshiq se hai bair tujhe aur ulfat jaanī auroñ se

chupke chupke ek to Tis aap jamani auron se

tis ulTi hum ko tohmat aa ke lagani auron se

hum se to bas bandhe rakhti sharm ki paTTi aankhon par

chori chori mahfil mein par aankh laDani auron se

auron ke to hum se na kahne hum se le kar ji ki baat

jun ki tun sab baat ye kyun ji ja ke sunani auron se

mujh se kaho ho aahen bhar bhar huk jigar mein uThti hai

aur yunhi dar-parda apni chah jatani auron se

laung khilaen hum jo kabhi to us ko Dalo munh se thuk

aur ye kyun ji roz mufarreh chhinke khani auron se

auron ke to ghar mein ja kar dauD ke pini aap sharab

mere aage pi nahin sakte mang ke pani auron se

hum jo paDhen koi sher to kahna sher se hum ko zauq nahin

'mir'-hasan ke ghar mein kahani ja ke paDhani auron se

parda is mein kya hai pyare duniya mein 'maruf' hai ye

aashiq se hai bair tujhe aur ulfat jaani auron se