dagh-e-dil hain ghairat-e-sad-lala-zar ab ke baras

dāġh-e-dil haiñ ġhairat-e-sad-lāla-zār ab ke baras

ba.ad muddat ke hai phir josh-e-bahār ab ke baras

ābiyārī se tirī ai teġh-e-yār ab ke baras

taḳhta-e-gul hai hamārā jism-e-zār ab ke baras

tā-ba-dāman hai garebāñ taar taar ab ke baras

TūTte haiñ talvoñ meñ chubh chubh ke ḳhaar ab ke baras

hai ye zor-e-āmad-e-fasl-e-bahār ab ke baras

mast haiñ zāhid bhī misl-e-bāda-ḳhvār ab ke baras

ulfat-e-sāqī ne lo zāhid ko bhī khīñchā idhar

daur-e-mai kā sub.ha par hogā shumār ab ke baras

fasl-e-gul meñ ba.ad-e-murdan bhī huā josh-e-junūñ

sañg-e-tiflāñ se ho tarmīm-e-mazār ab ke baras

shīshe meñ pinhāñ hai mai aur dil meñ zauq-e-mai-kashī

aate hī saaqī ke ai abr-e-bahār ab ke baras

sāqiyā ainak chaḌhe hoñ ranj-o-ġham bālā-e-tāq

bāda-e-dī-sāla kā shīsha utaar ab ke baras

zulm par bāñdhī hai phir sayyād-o-gulchīñ ne kamar

qaid-e-bulbul kī hai gulshan meñ pukār ab ke baras

aarzū hai ba.ad-e-murdan bhī rahūñ sairāb-e-mai

sarf-e-jām-o-ḳhum kareñ merā ġhubār ab ke baras

josh-e-ḳhūn-e-bulbul-e-shaidā kā paidā ho asar

le agar fasd-e-rag-e-gul nok-e-ḳhār ab ke baras

julte haiñ dil bulbuloñ ke āshiyāñ kī tarah se

ātish-e-gul kī hai gulshan meñ pukār ab ke baras

qismat apnī apnī hai achchhā mubārak ho 'habīb'

ḳhār-e-ġham ham ko tumheñ pahlū-e-yār ab ke baras

dagh-e-dil hain ghairat-e-sad-lala-zar ab ke baras

baad muddat ke hai phir josh-e-bahaar ab ke baras

aabiyari se teri ai tegh-e-yar ab ke baras

taKHta-e-gul hai hamara jism-e-zar ab ke baras

ta-ba-daman hai gareban tar tar ab ke baras

TuTte hain talwon mein chubh chubh ke KHar ab ke baras

hai ye zor-e-amad-e-fasl-e-bahaar ab ke baras

mast hain zahid bhi misl-e-baada-KHwar ab ke baras

ulfat-e-saqi ne lo zahid ko bhi khincha idhar

daur-e-mai ka subha par hoga shumar ab ke baras

fasl-e-gul mein baad-e-murdan bhi hua josh-e-junun

sang-e-tiflan se ho tarmim-e-mazar ab ke baras

shishe mein pinhan hai mai aur dil mein zauq-e-mai-kashi

aate hi saqi ke ai abr-e-bahaar ab ke baras

saqiya ainak chaDhe hon ranj-o-gham baala-e-taq

baada-e-di-sala ka shisha utar ab ke baras

zulm par bandhi hai phir sayyaad-o-gulchin ne kamar

qaid-e-bulbul ki hai gulshan mein pukar ab ke baras

aarzu hai baad-e-murdan bhi rahun sairab-e-mai

sarf-e-jam-o-KHum karen mera ghubar ab ke baras

josh-e-KHun-e-bulbul-e-shaida ka paida ho asar

le agar fasd-e-rag-e-gul nok-e-KHar ab ke baras

julte hain dil bulbulon ke aashiyan ki tarah se

aatish-e-gul ki hai gulshan mein pukar ab ke baras

qismat apni apni hai achchha mubarak ho 'habib'

KHar-e-gham hum ko tumhein pahlu-e-yar ab ke baras