daman ko uske khinchen aghyar sab taraf se

dāman ko us ke khīñcheñ aġhyār sab taraf se

aur aah ham ye khīñcheñ āzār sab taraf se

jab kām-e-dil na hargiz hāsil huā kahīñ se

dil ko uThā ke baiThe nā-chār sab taraf se

jī chāhtā hai is ke kūche meñ baiTh rahiye

kar tark-e-āshnā.ī yakbār sab taraf se

tujh paas bhī na aaveñ ham ab to jaa.eñ kīdhar

tū ne to ham ko khoyā ai yaar sab taraf se

mizhgāñ se us ke kyūñkar dil chhuT sake hamārā

ghere hue haiñ is ko ve ḳhaar sab taraf se

parde hazār hoveñ haa.il pa husn us kā

detā hai tāliboñ ko dīdār sab taraf se

konā bhī ek dil kā sābit nahīñ ye kis ne

is ghar ko kar diyā hai mismār sab taraf se

naala za.iif apnā pahuñchegā kyūñki vaañ tak

kī hai buland us ne dīvār sab taraf se

ik baar to azīzāñ tum mil ke haal merā

kar baiTho us ke aage iz.hār sab taraf se

dīvāna ho ke chhūTā duniyā se varna yārāñ

hote gale ke mere tum haar sab taraf se

ve din bhī aah koī kyā the ki jin dinoñ meñ

dil ko ḳhushī thī apne dildār sab taraf se

bas tere ġham meñ aa kar ab ḳhaak ho ga.e ham

dil bujh gayā hamārā ik baar sab taraf se

zikr-e-vafā-o-ulfat mat chheḌ bas 'hasan' ab

jī ho rahā hai apnā bezār sab taraf se

daman ko us ke khinchen aghyar sab taraf se

aur aah hum ye khinchen aazar sab taraf se

jab kaam-e-dil na hargiz hasil hua kahin se

dil ko uTha ke baiThe na-chaar sab taraf se

ji chahta hai is ke kuche mein baiTh rahiye

kar tark-e-ashnai yakbar sab taraf se

tujh pas bhi na aawen hum ab to jaen kidhar

tu ne to hum ko khoya ai yar sab taraf se

mizhgan se us ke kyunkar dil chhuT sake hamara

ghere hue hain is ko we KHar sab taraf se

parde hazar howen hail pa husn us ka

deta hai talibon ko didar sab taraf se

kona bhi ek dil ka sabit nahin ye kis ne

is ghar ko kar diya hai mismar sab taraf se

nala zaif apna pahunchega kyunki wan tak

ki hai buland us ne diwar sab taraf se

ek bar to azizan tum mil ke haal mera

kar baiTho us ke aage izhaar sab taraf se

diwana ho ke chhuTa duniya se warna yaran

hote gale ke mere tum haar sab taraf se

we din bhi aah koi kya the ki jin dinon mein

dil ko KHushi thi apne dildar sab taraf se

bas tere gham mein aa kar ab KHak ho gae hum

dil bujh gaya hamara ek bar sab taraf se

zikr-e-wafa-o-ulfat mat chheD bas 'hasan' ab

ji ho raha hai apna bezar sab taraf se