dastan kya thi aur kya bana di gai

dāstāñ kyā thī aur kyā banā dī ga.ī

kuchh ghaTā dī ga.ī kuchh baḌhā dī ga.ī

kar ke tajdīd-e-ahd-e-vafā dil-nashīñ

qaid kī aur muddat baḌhā dī ga.ī

jaañ hathelī pe le kar pahuñch hī ga.e

ahl-e-dil ko jahāñ bhī sadā dī ga.ī

rabt-e-bāham vo pahle sā baaqī nahīñ

kaisī sūrat jahāñ kī banā dī ga.ī

chashm-e-haq-bīñ meñ duniyā ye kuchh bhī nahīñ

sirf āñkhoñ meñ dilkash banā dī ga.ī

bhuul paanā unheñ ab to mumkin nahīñ

dil meñ kaisī ye sūrat basā dī ga.ī

kho ga.e kin ḳhayāloñ meñ tum ai 'sahar'

mahfil-e-jān-o-dil to sajā dī ga.ī

dastan kya thi aur kya bana di gai

kuchh ghaTa di gai kuchh baDha di gai

kar ke tajdid-e-ahd-e-wafa dil-nashin

qaid ki aur muddat baDha di gai

jaan hatheli pe le kar pahunch hi gae

ahl-e-dil ko jahan bhi sada di gai

rabt-e-baham wo pahle sa baqi nahin

kaisi surat jahan ki bana di gai

chashm-e-haq-bin mein duniya ye kuchh bhi nahin

sirf aankhon mein dilkash bana di gai

bhul pana unhen ab to mumkin nahin

dil mein kaisi ye surat basa di gai

kho gae kin KHayalon mein tum ai 'sahar'

mahfil-e-jaan-o-dil to saja di gai