دبے لفظوں کیا وعدہ بخوبی ہم نبھائیں گے

دبے لفظوں کیا وعدہ بخوبی ہم نبھائیں گے

محبت کا تقاضا ہے نہ تم کو بھول پائیں گے

گرا کر پردے پلکوں کے نمی خوردہ نگاہوں پر

تمہاری یاد میں کھو کر شب فرقت بتائیں گے

بہا لے جائے گا سیلاب گریہ خیمۂ جاں کو

طنابیں کھینچ بھی لیں تو اسے کب تک بچائیں گے

بے اندازہ ملے ہیں خوبیٔ تقدیر سے ہم کو

خدا معلوم یہ انبار غم کیسے اٹھائیں گے

نہیں ملتا کوئی معقول استدلال جینے کا

جہان فانیٔ بے رنگ قصداً چھوڑ جائیں گے

مہکتی شاخ سے ہوگی معطر پھر مشام جاں

جو گل اندام کو چشم تصور میں سجائیں گے

اکیلے آئے تھے ہم تو دیار عشق میں کامیؔ

نہ جانے کیوں یہ لگتا ہے اکیلے لوٹ جائیں گے