dahakte din mein ajab lutf uThaya karta tha

dahakte din meñ 'ajab lutf uThāyā kartā thā

maiñ apne haath kā titlī pe saaya kartā thā

agar maiñ pūchhtā bādal kidhar ko jaate haiñ

javāb meñ koī aañsū bahāyā kartā thā

maiñ apnī TūTtī āvāz gāñThne ke liye

kahīñ se lafz kā paivand laayā kartā thā

'ajīb hasrat-e-parvāz mujh meñ hotī thī

maiñ copiyoñ meñ parinde banāyā kartā thā

talāsh-e-rizq meñ bhaTke hue parindoñ ko

maiñ jeb ḳharch se daanā khilāyā kartā thā

hamāre ghar ke qarīb ek jhiil hotī thī

aur us meñ shaam ko sūraj nahāyā kartā thā

ye zindagī to mujhe tere paas le aa.ī

ye rāsta to kahīñ aur jaayā kartā thā

dahakte din mein 'ajab lutf uThaya karta tha

main apne hath ka titli pe saya karta tha

agar main puchhta baadal kidhar ko jate hain

jawab mein koi aansu bahaya karta tha

main apni TuTti aawaz ganThne ke liye

kahin se lafz ka paiwand laya karta tha

'ajib hasrat-e-parwaz mujh mein hoti thi

main copiyon mein parinde banaya karta tha

talash-e-rizq mein bhaTke hue parindon ko

main jeb KHarch se dana khilaya karta tha

hamare ghar ke qarib ek jhil hoti thi

aur us mein sham ko suraj nahaya karta tha

ye zindagi to mujhe tere pas le aai

ye rasta to kahin aur jaya karta tha