dam-ba-dam sajda-e-sarmast ki bidat kiye ja

dam-ba-dam sajda-e-sarmast kī bid'at kiye jā

mā’bad-e-‘ishq meñ bharpūr 'ibādat kiye jā

haiñ jamā'at meñ har ik dā.era-e-fikr ke log

vaqfe vaqfe se tū e'lān-e-iqāmat kiye jā

jāntā huuñ ki hai ye 'ahd-e-tanāfur phir bhī

mashvara maiñ tujhe detā huuñ mohabbat kiye jā

maal jis kā bhī hai sab baañT de lāchāroñ meñ

kar mohabbat kī amānat meñ ḳhayānat kiye jā

roknā zulm nahīñ hai tire bas meñ lekin

jitnī mumkin ho mire dost mazammat kiye jā

ye bhī kahtā huuñ rivāyat se baġhāvat mat kar

ye bhī kahtā huuñ ki tabdīl rivāyat kiye jā

aur phailāv baḌhā apnī nazar kā 'āsim'

apne manzar kī vasī' aur bhī vus'at kiye jā

dam-ba-dam sajda-e-sarmast ki bid'at kiye ja

ma’bad-e-‘ishq mein bharpur 'ibaadat kiye ja

hain jama'at mein har ek daera-e-fikr ke log

waqfe waqfe se tu e'lan-e-iqamat kiye ja

jaanta hun ki hai ye 'ahd-e-tanafur phir bhi

mashwara main tujhe deta hun mohabbat kiye ja

mal jis ka bhi hai sab banT de lachaaron mein

kar mohabbat ki amanat mein KHayanat kiye ja

rokna zulm nahin hai tere bas mein lekin

jitni mumkin ho mere dost mazammat kiye ja

ye bhi kahta hun riwayat se baghawat mat kar

ye bhi kahta hun ki tabdil riwayat kiye ja

aur phailaw baDha apni nazar ka 'asim'

apne manzar ki wasi' aur bhi wus'at kiye ja