دم بہ دم سجدۂ سرمست کی بدعت کیے جا

دم بہ دم سجدۂ سرمست کی بدعت کیے جا

معبد عشق میں بھرپور عبادت کیے جا

ہیں جماعت میں ہر اک دائرۂ فکر کے لوگ

وقفہ وقفہ سے تو اعلان اقامت کیے جا

جانتا ہوں کہ ہے یہ عہد تنافر پھر بھی

مشورہ میں تجھے دیتا ہوں محبت کیے جا

مال جس کا بھی ہے سب بانٹ دے لاچاروں میں

کر محبت کی امانت میں خیانت کیے جا

روکنا ظلم نہیں ہے ترے بس میں لیکن

جتنی ممکن ہو مرے دوست مذمت کیے جا

یہ بھی کہتا ہوں روایت سے بغاوت مت کر

یہ بھی کہتا ہوں کہ تبدیل روایت کیے جا

اور پھیلاؤ بڑھا اپنی نظر کا عاصمؔ

اپنے منظر کی وسیع اور بھی وسعت کیے جا