dar bana baiTha hun diwar bana baiTha hun

dar banā baiThā huuñ dīvār banā baiThā huuñ

aur samajhtā huuñ ki ghar-bār banā baiThā huuñ

uThtā jaatā hai sitāre pe sitāra aur maiñ

vahī bedār kā bedār banā baiThā huuñ

kis mulāqāt kī tayyārī hai aur kab se hai

kuchh giraftār giraftār banā baiThā huuñ

kahīñ sho'la hī rukā hai na kahīñ raakh mirī

maiñ ye sab manzileñ bekār banā baiThā huuñ

TuuT jaatā hai ye lamha ise jaise bhī banā.ūñ

baiThte uThte ka.ī baar banā baiThā huuñ

ḳhud ko bhugtāyā hai ik shaḳhs ko nimTāyā hai

ye jo insān sā nāchār banā baiThā huuñ

na maiñ jaatā huuñ yahāñ se na maiñ aatā huuñ yahāñ

is galī meñ 'ajab āzār banā baiThā huuñ

dar bana baiTha hun diwar bana baiTha hun

aur samajhta hun ki ghar-bar bana baiTha hun

uThta jata hai sitare pe sitara aur main

wahi bedar ka bedar bana baiTha hun

kis mulaqat ki tayyari hai aur kab se hai

kuchh giraftar giraftar bana baiTha hun

kahin sho'la hi ruka hai na kahin rakh meri

main ye sab manzilen bekar bana baiTha hun

TuT jata hai ye lamha ise jaise bhi banaun

baiThte uThte kai bar bana baiTha hun

KHud ko bhugtaya hai ek shaKHs ko nimTaya hai

ye jo insan sa nachaar bana baiTha hun

na main jata hun yahan se na main aata hun yahan

is gali mein 'ajab aazar bana baiTha hun