Dar maut ka na KHauf kisi devta ka tha

Dar maut kā na ḳhauf kisī devtā kā thā

vo fat.h-yāb yuuñ thā ki banda ḳhudā kā thā

pahle bhī hādsāt hue zindagī ke saath

lekin jo aaj dekhā vo manzar balā kā thā

lo vo bhī gir gayā mire āñgan kā peḌ aaj

har vaqt jis se aasrā taaza havā kā thā

sun kar jise pahāḌoñ ke siine dahal ga.e

ye bhī karishma dosto apnī sadā kā thā

tūfāñ se bach nikalne kī sūrat na thī koī

ye faiz merī maañ ke hī dast-e-duā kā thā

tum bhī bhulā do tark-e-ta.alluq kā vāqi.a

ham bhī ye soch leñge ki jhoñkā havā kā thā

sāhil pe lā ke aap safīne jalā diye

ye kaam bhī 'vasīm' hamārī anā kā thā

Dar maut ka na KHauf kisi dewta ka tha

wo fath-yab yun tha ki banda KHuda ka tha

pahle bhi hadsat hue zindagi ke sath

lekin jo aaj dekha wo manzar bala ka tha

lo wo bhi gir gaya mere aangan ka peD aaj

har waqt jis se aasra taza hawa ka tha

sun kar jise pahaDon ke sine dahal gae

ye bhi karishma dosto apni sada ka tha

tufan se bach nikalne ki surat na thi koi

ye faiz meri man ke hi dast-e-dua ka tha

tum bhi bhula do tark-e-talluq ka waqia

hum bhi ye soch lenge ki jhonka hawa ka tha

sahil pe la ke aap safine jala diye

ye kaam bhi 'wasim' hamari ana ka tha