dar-parda-e-tuyur chahak bhi usi ki hai

dar-parda-e-tuyūr chahak bhī usī kī hai

phūloñ ke bhes meñ ye mahak bhī usī kī hai

kab tak bahār rakkhe chaman-zār-e-zindagī

shāḳh-e-badan usī kī lachak bhī usī kī hai

ham bhī usī ke ho ga.e yādeñ bhī jis kī haiñ

yādoñ ke andarūn kasak bhī usī kī hai

har zarre ko sikhā.ī hai jis ne musavvirī

ā.īna-e-jamāl jhalak bhī usī kī hai

chālāk dil to ho nahīñ saktā thā yuuñ shikār

qaus-o-quzah usī kī dhanak bhī usī kī hai

dil ke har ek goshe meñ taskīn jis se hai

har kūcha-e-jigar meñ khaTak bhī usī kī hai

ai dil na be-qarār ho paa.el kī chaap se

pāzeb jis ke naam khanak bhī usī kī hai

harkāre us ke hī to haiñ dar-rāh-e-jism-o-jāñ

ik ik nazar nigāh talak bhī usī kī hai

jis ke karam ne 'sānī' ko baḳhshī haiñ jur.ateñ

iz.hār-e-mudda'ā meñ jhijak bhī usī kī hai

dar-parda-e-tuyur chahak bhi usi ki hai

phulon ke bhes mein ye mahak bhi usi ki hai

kab tak bahaar rakkhe chaman-zar-e-zindagi

shaKH-e-badan usi ki lachak bhi usi ki hai

hum bhi usi ke ho gae yaaden bhi jis ki hain

yaadon ke andarun kasak bhi usi ki hai

har zarre ko sikhai hai jis ne musawwiri

aaina-e-jamal jhalak bhi usi ki hai

chaalak dil to ho nahin sakta tha yun shikar

qaus-o-quzah usi ki dhanak bhi usi ki hai

dil ke har ek goshe mein taskin jis se hai

har kucha-e-jigar mein khaTak bhi usi ki hai

ai dil na be-qarar ho pael ki chap se

pazeb jis ke nam khanak bhi usi ki hai

harkare us ke hi to hain dar-rah-e-jism-o-jaan

ek ek nazar nigah talak bhi usi ki hai

jis ke karam ne 'sani' ko baKHshi hain juraten

izhaar-e-mudda'a mein jhijak bhi usi ki hai