Dara saki na tawahhum ki tirgi mujhko

Darā sakī na tavahhum kī tīrgī mujh ko

milī charāġh-e-yaqīñ se vo raushnī mujh ko

hayāt taptī rahī ġham ke sho'la-zāroñ meñ

kisī ke pyaar kī shabnam na mil sakī mujh ko

ghaTā siyāh sahī rok luuñ qadam kyūñkar

ghaTā ke paar bulātī hai chāñdnī mujh ko

milā hai mujh se ujālā kisī ko ashkoñ kā

kisī ne dī hai tabassum kī chāñdnī mujh ko

jalā ke dil kā diyā rāste sañvār diye

na dī jo chāñd-sitāroñ ne raushnī mujh ko

jalā ke 'sham’’ jigar ātish-e-shab-e-hijrāñ

batā hī detī hai mafhūm-e-zindagī mujh ko

Dara saki na tawahhum ki tirgi mujh ko

mili charagh-e-yaqin se wo raushni mujh ko

hayat tapti rahi gham ke sho'la-zaron mein

kisi ke pyar ki shabnam na mil saki mujh ko

ghaTa siyah sahi rok lun qadam kyunkar

ghaTa ke par bulati hai chandni mujh ko

mila hai mujh se ujala kisi ko ashkon ka

kisi ne di hai tabassum ki chandni mujh ko

jala ke dil ka diya raste sanwar diye

na di jo chand-sitaron ne raushni mujh ko

jala ke 'sham’’ jigar aatish-e-shab-e-hijran

bata hi deti hai mafhum-e-zindagi mujh ko