daraKHt-e-sham ke sae simaTne lag gae hain

daraḳht-e-shām ke saa.e simaTne lag ga.e haiñ

musāfiroñ ke qadam phir palaTne lag ga.e haiñ

ye daf'atan hameñ kis kā ḳhayāl aayā hai

jo apne aap hī se ham lipaTne lag ga.e haiñ

kabhī ye log muhājir the is qabīle ke

jo aaj apne qabīloñ meñ baTne lag ga.e haiñ

na thī umiid kisī rābte kī jin se koī

hamāre rābte un se bhī kaTne lag ga.e haiñ

mujhe yaqīñ hai koī chāñd aane vaalā hai

sitāre aap hī raste se haTne lag ga.e haiñ

pighal gayā hai kisī ġham kī dhuup kā TukḌā

ye merī āñkhoñ se jo abr chhaTne lag ga.e haiñ

daraKHt-e-sham ke sae simaTne lag gae hain

musafiron ke qadam phir palaTne lag gae hain

ye daf'atan hamein kis ka KHayal aaya hai

jo apne aap hi se hum lipaTne lag gae hain

kabhi ye log muhajir the is qabile ke

jo aaj apne qabilon mein baTne lag gae hain

na thi umid kisi rabte ki jin se koi

hamare rabte un se bhi kaTne lag gae hain

mujhe yaqin hai koi chand aane wala hai

sitare aap hi raste se haTne lag gae hain

pighal gaya hai kisi gham ki dhup ka TukDa

ye meri aankhon se jo abr chhaTne lag gae hain