darbar-e-shah mein na yun sar ko jhuka ke baiTh

darbār-e-shāh meñ na yuuñ sar ko jhukā ke baiTh

ai dost uTh faqīr kī mahfil meñ aa ke baiTh

mat ro guzār dhuup ko bādal kī oT se

ban jā.egī dhanak to zarā muskurā ke baiTh

paate haiñ māhtāb kī lau se miThās phal

nādān us kī nazroñ se nazreñ milā ke baiTh

chehra agar hai aa.ina to aañkh jhiil hai

har 'aks meñ ḳhulūs kā manzar sajā ke baiTh

jab āstīñ ke saañp kā Dasnā sarisht hai

phir tū bhī āstīn meñ ḳhanjar chhupā ke baiTh

kaisī havā chalī hai ki raqsāñ hai phuul phuul

thoḌī sī bhī hayā ho to āñkheñ churā ke baiTh

iblīs kī bisāt pe shatranj khel jā

bātil kā mohra nā’ra-e-haq se girā ke baiTh

mātam kā silsila na ruke bā'd-e-marg bhī

merī lahad pe bulbul-e-ranjīda aa ke baiTh

alfāz be-ma'ānī haiñ kuchh zindagī meñ 'zain'

jo uTh ga.e haiñ nuqte mukarrar biThā ke baiTh

darbar-e-shah mein na yun sar ko jhuka ke baiTh

ai dost uTh faqir ki mahfil mein aa ke baiTh

mat ro guzar dhup ko baadal ki oT se

ban jaegi dhanak to zara muskura ke baiTh

pate hain mahtab ki lau se miThas phal

nadan us ki nazron se nazren mila ke baiTh

chehra agar hai aaina to aankh jhil hai

har 'aks mein KHulus ka manzar saja ke baiTh

jab aastin ke sanp ka Dasna sarisht hai

phir tu bhi aastin mein KHanjar chhupa ke baiTh

kaisi hawa chali hai ki raqsan hai phul phul

thoDi si bhi haya ho to aankhen chura ke baiTh

iblis ki bisat pe shatranj khel ja

baatil ka mohra na’ra-e-haq se gira ke baiTh

matam ka silsila na ruke ba'd-e-marg bhi

meri lahad pe bulbul-e-ranjida aa ke baiTh

alfaz be-ma'ani hain kuchh zindagi mein 'zain'

jo uTh gae hain nuqte mukarrar biTha ke baiTh