dard aisa hai ki har mu-e-badan kanpta hai

dard aisā hai ki har mū-e-badan kāñptā hai

aah bhartā huuñ to āhū-e-ḳhutan kāñptā hai

kyoñ zamīñ terī nahīñ hotī numū-āmāda

qaht-sālī se yahāñ fard-e-vatan kāñptā hai

dast-āmoz parindoñ ne bhī hijrat kar lī

barq aisī hai ki har murġh-e-chaman kāñptā hai

koī tasvīr ke parde se bulātā hai mujhe

paas jā.ūñ to vo shah-pāra-e-fan kāñptā hai

chup kī dīvār girā duuñ na taḳhātub se kahīñ

zabt-e-guftār se ab merā dahan kāñptā hai

chāh-e-kan’āñ se nikal aaya huuñ yūsuf kī tarah

kyoñ zuleḳhā kā magar chāh-e-zaqan kāñptā hai

apnā uslūb zamāne se judā hai shāyad

she'r suntā hai to har sāhib-e-fan kāñptā hai

garche kholā bhī nahīñ tū ne abhī bāb-e-suḳhan

kyā qayāmat hai 'muzaffar' ki dakan kāñptā hai

dard aisa hai ki har mu-e-badan kanpta hai

aah bharta hun to aahu-e-KHutan kanpta hai

kyon zamin teri nahin hoti numu-amada

qaht-sali se yahan fard-e-watan kanpta hai

dast-amoz parindon ne bhi hijrat kar li

barq aisi hai ki har murgh-e-chaman kanpta hai

koi taswir ke parde se bulata hai mujhe

pas jaun to wo shah-para-e-fan kanpta hai

chup ki diwar gira dun na taKHatub se kahin

zabt-e-guftar se ab mera dahan kanpta hai

chah-e-kan’an se nikal aaya hun yusuf ki tarah

kyon zuleKHa ka magar chah-e-zaqan kanpta hai

apna uslub zamane se juda hai shayad

she'r sunta hai to har sahib-e-fan kanpta hai

garche khola bhi nahin tu ne abhi bab-e-suKHan

kya qayamat hai 'muzaffar' ki dakan kanpta hai