dard ban jae jo darman to ghazal hoti hai

dard ban jaa.e jo darmāñ to ġhazal hotī hai

chārāgar bhī lage hairāñ to ġhazal hotī hai

koī bismil jo ho shādāñ to ġhazal hotī hai

koī qātil ho pashemāñ to ġhazal hotī hai

shab ko aane kā yaqīñ puurā dilā kar shab meñ

toḌ Daale koī paimāñ to ġhazal hotī hai

yaas ke ghor añdhere meñ achānak koī

sham' ho jaa.e farozāñ to ġhazal hotī hai

Tiis uThtī hai ġhazal ban ke mire siine se

zaḳhm kartā hai jo ehsāñ to ġhazal hotī hai

zulmat-e-hijr meñ rah rah ke kasak uThne se

ho kaThin raat bhī āsāñ to ġhazal hotī hai

ek chingārī jo mastūr hai mere dil meñ

raat ko kar de daraḳhshāñ to ġhazal hotī hai

phuul khilte haiñ to hotī hai chaman meñ ḳhushbū

dil meñ hotā hai charāġhāñ to ġhazal hotī hai

ālam-e-shauq-e-mulāqāt meñ parvāne se

sham' hotī hai gurezāñ to ġhazal hotī hai

mujh se sargoshiyāñ kartī hai ḳhamoshī shab kī

aur phir uThtā hai tūfāñ to ġhazal hotī hai

aarzū paa.e jo takmīl to hotī hai fanā

ghaT ke rah jaa.e jo armāñ to ġhazal hotī hai

be-karāñ jaur-o-sitam hī nahīñ laate us ko

ho karam bhī jo farāvāñ to ġhazal hotī hai

dard ban jae jo darman to ghazal hoti hai

chaaragar bhi lage hairan to ghazal hoti hai

koi bismil jo ho shadan to ghazal hoti hai

koi qatil ho pasheman to ghazal hoti hai

shab ko aane ka yaqin pura dila kar shab mein

toD Dale koi paiman to ghazal hoti hai

yas ke ghor andhere mein achanak koi

sham' ho jae farozan to ghazal hoti hai

Tis uThti hai ghazal ban ke mere sine se

zaKHm karta hai jo ehsan to ghazal hoti hai

zulmat-e-hijr mein rah rah ke kasak uThne se

ho kaThin raat bhi aasan to ghazal hoti hai

ek chingari jo mastur hai mere dil mein

raat ko kar de daraKHshan to ghazal hoti hai

phul khilte hain to hoti hai chaman mein KHushbu

dil mein hota hai charaghan to ghazal hoti hai

aalam-e-shauq-e-mulaqat mein parwane se

sham' hoti hai gurezan to ghazal hoti hai

mujh se sargoshiyan karti hai KHamoshi shab ki

aur phir uThta hai tufan to ghazal hoti hai

aarzu pae jo takmil to hoti hai fana

ghaT ke rah jae jo arman to ghazal hoti hai

be-karan jaur-o-sitam hi nahin late us ko

ho karam bhi jo farawan to ghazal hoti hai