dard bhi uThta raha aur ghaw bhi riste rahe

dard bhī uThtā rahā aur ghaav bhī riste rahe

koshisheñ nākām thiiñ so 'ishq meñ uljhe rahe

chal rahe the saath lekin dūriyāñ baḌhtī rahīñ

yā'nī donoñ sirf apne ḳhvāb hī bunte rahe

āsmāñ se dastakeñ aatī rahīñ aatī rahīñ

aur zamīñ vaale jo karte the vahī karte rahe

sirf pūchhā thā udāsī se udāsī kā sabab

aur phir us ke qadam merī taraf baḌhte rahe

merā pahlā pyaar thā vo aur us kī dil-lagī

hādisa thā ek lekin 'umr bhar sadme rahe

nafrateñ sāzish siyāsat aur 'adāvat chār-sū

dekh kar duniyā baḌoñ kī ham sadā bachte rahe

koshisheñ to sab ne kiiñ ham ko badalne kī magar

ham to ham haiñ kyoñ badalte vaise ki vaise rahe

is liye vo kar na paayā phir kisī par e'tibār

jo muhāfiz thā usī se to sabhī ḳhatre rahe

har ḳhushī se munsalik thā us ke kho jaane kā Dar

haañ ḳhushī jab bhī milī ḳhush the magar sahme rahe

vo baḌe hone kī dhun meñ ho ga.e tahlīl yuuñ

jab samā.e vo samundar meñ kahāñ qatre rahe

dard bhi uThta raha aur ghaw bhi riste rahe

koshishen nakaam thin so 'ishq mein uljhe rahe

chal rahe the sath lekin duriyan baDhti rahin

ya'ni donon sirf apne KHwab hi bunte rahe

aasman se dastaken aati rahin aati rahin

aur zamin wale jo karte the wahi karte rahe

sirf puchha tha udasi se udasi ka sabab

aur phir us ke qadam meri taraf baDhte rahe

mera pahla pyar tha wo aur us ki dil-lagi

hadisa tha ek lekin 'umr bhar sadme rahe

nafraten sazish siyasat aur 'adawat chaar-su

dekh kar duniya baDon ki hum sada bachte rahe

koshishen to sab ne kin hum ko badalne ki magar

hum to hum hain kyon badalte waise ki waise rahe

is liye wo kar na paya phir kisi par e'tibar

jo muhafiz tha usi se to sabhi KHatre rahe

har KHushi se munsalik tha us ke kho jaane ka Dar

han KHushi jab bhi mili KHush the magar sahme rahe

wo baDe hone ki dhun mein ho gae tahlil yun

jab samae wo samundar mein kahan qatre rahe