dard darman se kam to kya hoga

dard darmāñ se kam to kyā hogā

yahī hogā ki kuchh sivā hogā

kis qayāmat kā sāmnā hogā

bujh gayā dil to aah kyā hogā

khul ga.e haiñ ḳhushī se sab ke dahan

zaḳhm-e-dil koī chhū gayā hogā

husn ko chāhe aur duur rahe

koī ham sā bhī pārsā hogā

maut aa.egī aur na aa.egī

tum na aa.e to aur kyā hogā

dil pe añgāre se baraste haiñ

dhyān rāhat kā aa gayā hogā

shaam hī se hai dil kī hālat ġhair

sub.h tak to na jaane kyā hogā

laakh de rañj laakh zulm kare

dilrubā phir bhī dilrubā hogā

vo mujhe mil ga.e zahe taalā

na milā dil se dil to kyā hogā

ye bhī koī karāhne kī hai baat

kuchh 'jigar' dard baḌh gayā hogā

miT gayā dil jigar qarār nahīñ

is mohabbat kā hashr kyā hogā

ruḳh jo us ne 'jigar' se pher liyā

daaġh dil kā dikhā diyā hogā

dard darman se kam to kya hoga

yahi hoga ki kuchh siwa hoga

kis qayamat ka samna hoga

bujh gaya dil to aah kya hoga

khul gae hain KHushi se sab ke dahan

zaKHm-e-dil koi chhu gaya hoga

husn ko chahe aur dur rahe

koi hum sa bhi parsa hoga

maut aaegi aur na aaegi

tum na aae to aur kya hoga

dil pe angare se baraste hain

dhyan rahat ka aa gaya hoga

sham hi se hai dil ki haalat ghair

subh tak to na jaane kya hoga

lakh de ranj lakh zulm kare

dilruba phir bhi dilruba hoga

wo mujhe mil gae zahe tala

na mila dil se dil to kya hoga

ye bhi koi karahne ki hai baat

kuchh 'jigar' dard baDh gaya hoga

miT gaya dil jigar qarar nahin

is mohabbat ka hashr kya hoga

ruKH jo us ne 'jigar' se pher liya

dagh dil ka dikha diya hoga