dard-e-dil dard-e-jigar achchha laga

dard-e-dil dard-e-jigar achchhā lagā

lams-e-dast-e-chāra-gar achchhā lagā

dard uTThā jhuum kar achchhā lagā

terā shāna merā sar achchhā lagā

jis ke saa.e meñ milā karte the ham

baaġh meñ tanhā shajar achchhā lagā

terī ḳhalvat terī mahfil ḳhuub hai

terā kūcha terā ghar achchhā lagā

muskurā ke dil liyā phir kho ga.e

aap kā ye bhī hunar achchhā lagā

Dar ke mere siine se lagnā tirā

mausam-e-barq-o-sharar achchhā lagā

talḳhiyoñ se unsiyat hone lagī

sāqiyā mai kā asar achchhā lagā

maiñ thā vo the aur thī ra.anā.iyāñ

ġhāliban 'tābish' safar achchhā lagā

dard-e-dil dard-e-jigar achchha laga

lams-e-dast-e-chaara-gar achchha laga

dard uTTha jhum kar achchha laga

tera shana mera sar achchha laga

jis ke sae mein mila karte the hum

bagh mein tanha shajar achchha laga

teri KHalwat teri mahfil KHub hai

tera kucha tera ghar achchha laga

muskura ke dil liya phir kho gae

aap ka ye bhi hunar achchha laga

Dar ke mere sine se lagna tera

mausam-e-barq-o-sharar achchha laga

talKHiyon se unsiyat hone lagi

saqiya mai ka asar achchha laga

main tha wo the aur thi ranaiyan

ghaaliban 'tabish' safar achchha laga